Samoa Beat

samoa_beat.jpg

Ua tele le aoga o le poloketi o le vai taele a le autalavou a le Ekalesia Faapotopotoga Kerisiano i Samoa a Salelologa, i atina’e faalenatura.

 

Ua amanaia e se tasi o poloketi a le faalapotopotoga a malo soofatasi lenei atinae ua avea ma punaoa faalenatura mo le afioaga.

 

Na taua e le tai ulu a le poloketi le susuga I le Fa’afeagaiga ia Valaauina F. Taumua, “E matauina I tausaga ua alu, tasi nei o vai ua lolofi mai ai tagata o le nuu.”

 

Peita’i, ona o le tele o tausag ao fa’alagolago le afioaga I le nei vai, ua avea lea ma auala ua faaleagaina ai. Na sailia loa lea e le autalavou a le E.F.K.S i le pitonu’u o Foua se fesoasoani e toe faaleleia ai le vai taele.

 

“Ua fai si lapisia, ia na tau saili loa laia o se auala e faatupe ai lenei vai ia le ala la lea na talosaga ai loa tagata o le matou nuu o loo i luga le malo ma le United Nation.”

O lenei mataupu na talanoaina i le tausaga 2017 ma na taliaina le latou talosaga ia Aperila 2018.

 

“Na talosagaina e le matou faalapotopotoga se $50,000 tala Amerika mai le malo, ina ia faaleleia ai le vai taele aemaise ni talone lapisi mo le afioaga, peitai e $23,000 Amerika na tali ai le malo e tusa lea ma le $60,000 tala Samoa.”

 

Na saunoa foi le Susuga ia Rev. Taumua, ua maea ona faataatia tulafono ole vai taele ina ia tumau ai pea I le lelei.

 

“O nei tulafono e agai atu i le pitonuu, ona ave lea e le pitonuu i totonu o saofaiga a le afioaga ina ia aloaia ai tulafono."

 

 

E tolu vaega po’o laasaga o loo faatino ai le poloketi, o le taimi nei ua oo i le vaega lua.

 

O lo’o faamoemoe atu I le faaiuga o lenei tausaga po’o le amataga foi o le tausaga fou ua tatala le vai.

 

O lea foi faamoemoe ua luitauina ai le fanau ma tupulaga i le faalapisi, ina ia tumau ai pea le mama ma le matagofie o lea afioaga.

O le igoa o lea vai, o le Vai o Tautai.