O Falealupo, o se tasi nei o afioaga o loo malosi lo latou faatauaina o le vaomatua.

O lenei vaomatua na taua i le saunoaga a se tasi o matai o le afioaga, ua faaigoaina o le Vaosa’oloto aua o lenei fa’asao e tele sona aoga i le afioaga, i le faasaoina o laau toto ma le anoanoai o ituaiga manu ese’ese .

O le tele o nei laau o loo totonu o lenei faasao, na taua ua faitau selau tausaga talu ona faasaoina e le afioaga i totonu o lenei vaomatua.

Ua mafai ona faatautaia lenei galuega e ala i le lagolago malosi a matai ae maise tagata nuu o lenei afioaga.

Na maua se taimi e faatalatalanoaina ai e le vasega o faasalalau se tasi o matai o le afioaga Fuiono Falemalu Kenina, e ala lea i mataupu e faasino i le lenei vaomatua ua lauiloa i le lalolagi.

“O le talaaga o lenei vaomatua tele i totonu o le nuu o Falealupo, sa faataoto a e leai ni ona fuafuaaga ma ni ona tamaoaiga, sa ola lava nao le vao.”

O lenei galuega tele na amataina ina ua toai taunuu mai ni alii mai Amerika ma le tamaloa e igoa ia Nafanua Paul Cox, lea na amatalia le fausaga o le auala savali poo le Canopy Walk i le faaperetania.

O lenei la galuega o loo faia pea ma alagaoa o le afioaga aua faalavelave o le nuu aemaise a latou mea fai.

Na taua foi e Fuiono, ua uma ona faataatitia tulafono aua le puipuia o nei laau i totonu o lenei vaomatua.

Ma e oo i le 20 aumatua le sala e faasalaina ai se tasi e maua atu o faatamaia nei vao o loo faasao i totonu o lenei vaomatua.